mere hone ka tamasha nahin hone deta

mere hone kā tamāshā nahīñ hone detā

zarf dhīmā mirā lahja nahīñ hone detā

jhiil kī tarah mujhe qaid kiyā hai us ne

mere jazbāt ko dariyā nahīñ hone detā

istiānat vo bahar-hāl kiyā kartā hai

merā mālik mujhe rusvā nahīñ hone detā

merī aadat hai ki poshīda madad kartā huuñ

apne hamsā.e ko rusvā nahīñ hone detā

nit na.e dard diyā kartā hai dilbar mujh ko

ġham-e-duniyā ko akelā nahīñ hone detā

jis ko paalā ki buḌhāpe kī banegā lāThī

ḳhud kā beTā ye sahārā nahīñ hone detā

Daal detā hai vo rishtoñ meñ darāḌeñ 'az.har'

bhā.iyoñ ko kabhī yakjā nahīñ hone detā

mere hone ka tamasha nahin hone deta

zarf dhima mera lahja nahin hone deta

jhil ki tarah mujhe qaid kiya hai us ne

mere jazbaat ko dariya nahin hone deta

istianat wo bahar-haal kiya karta hai

mera malik mujhe ruswa nahin hone deta

meri aadat hai ki poshida madad karta hun

apne hamsae ko ruswa nahin hone deta

nit nae dard diya karta hai dilbar mujh ko

gham-e-duniya ko akela nahin hone deta

jis ko pala ki buDhape ki banega laThi

KHud ka beTa ye sahaara nahin hone deta

Dal deta hai wo rishton mein daraDen 'azhar'

bhaiyon ko kabhi yakja nahin hone deta