mere hujre mein ajab be-raunaqi ka aks hai

mere hujre meñ ajab be-raunaqī kā aks hai

maiñ huuñ yā mere alāva aur kisī kā aks hai

aa ke qadmoñ meñ koī makrūh parchhā.īñ girī

maiñ ne pīchhe muḌ ke dekhā aadmī kā aks hai

chāñd ke chehre pe terī yā ki tujh pe chāñd kī

faisla mushkil hai kis pe chāñdnī kā aks hai

itne be-Dhab zāviye se raushnī ab ke paḌī

zindagī samjhī ki shāyad jāñ-kanī kā aks hai

in badalte mausamoñ kā bhed khultā hī nahīñ

kis kī san.at hai ye kis kārīgarī kā aks hai

shawl meñ lipTī huī shāmeñ gharoñ tak aa ga.iiñ

Dhalte sūraj kyā salām-e-āḳhirī kā aks hai

jo bichhaḌte vaqt mere lams meñ Thahrī rahī

chashm-e-yāqūtī meñ us angushtarī kā aks hai

mere hujre mein ajab be-raunaqi ka aks hai

main hun ya mere alawa aur kisi ka aks hai

aa ke qadmon mein koi makruh parchhain giri

main ne pichhe muD ke dekha aadmi ka aks hai

chand ke chehre pe teri ya ki tujh pe chand ki

faisla mushkil hai kis pe chandni ka aks hai

itne be-Dhab zawiye se raushni ab ke paDi

zindagi samjhi ki shayad jaan-kani ka aks hai

in badalte mausamon ka bhed khulta hi nahin

kis ki sanat hai ye kis karigari ka aks hai

shawl mein lipTi hui shamen gharon tak aa gain

Dhalte suraj kya salam-e-aKHiri ka aks hai

jo bichhaDte waqt mere lams mein Thahri rahi

chashm-e-yaquti mein us angushtari ka aks hai