میرے حجرے میں عجب بے رونقی کا عکس ہے

میرے حجرے میں عجب بے رونقی کا عکس ہے

میں ہوں یا میرے علاوہ اور کسی کا عکس ہے

آ کے قدموں میں کوئی مکروہ پرچھائیں گری

میں نے پیچھے مڑ کے دیکھا آدمی کا عکس ہے

چاند کے چہرے پہ تیری یا کہ تجھ پہ چاند کی

فیصلہ مشکل ہے کس پہ چاندنی کا عکس ہے

اتنے بے ڈھب زاویے سے روشنی اب کے پڑی

زندگی سمجھی کہ شاید جاں کنی کا عکس ہے

ان بدلتے موسموں کا بھید کھلتا ہی نہیں

کس کی صنعت ہے یہ کس کاریگری کا عکس ہے

شال میں لپٹی ہوئی شامیں گھروں تک آ گئیں

ڈھلتے سورج کیا سلام آخری کا عکس ہے

جو بچھڑتے وقت میرے لمس میں ٹھہری رہی

چشم یاقوتی میں اس انگشتری کا عکس ہے