mere jazbaat ki rau jaane kahan bahki hai

mere jazbāt kī rau jaane kahāñ bahkī hai

ab to mushkil hai chhupānā tujhe afsānoñ meñ

dil kā sho.ala to bhaḌaktā hī rahā ashkoñ se

raat bhar sham.a pighaltī rahī parvānoñ meñ

rang-e-iḳhlās-o-vafā kaifiyat-e-soz-o-gudāz

aur kyā chiiz sajā.ūñ tire armānoñ meñ

phir mirī āñkhoñ meñ lahrāyā tirā ḳhvāb-e-hasīñ

le chalī niiñd mujhe tere shabistānoñ meñ

zindagī chāhe kahīñ kar le Thikānā apnā

ruuh mañDlātī rahegī tire kāshānoñ meñ

ek nairañg-e-junūñ-sāz sadā-e-paiham

hai ye andāz-e-kashish husn ke dīvānoñ meñ

aaj bahkī huī duniyā hai nigāhoñ meñ mirī

jaane kyā baat hai saaqī tire paimānoñ meñ

thā kahāñ hosh tire tishna-laboñ meñ baaqī

dil kā paimāna liye rah ga.e mai-ḳhānoñ meñ

chāñd kā phīkā tabassum gul-e-pazhmurda hī

raunaqeñ haiñ yahī baaqī mire vīrānoñ meñ

mere jazbaat ki rau jaane kahan bahki hai

ab to mushkil hai chhupana tujhe afsanon mein

dil ka shoala to bhaDakta hi raha ashkon se

raat bhar shama pighalti rahi parwanon mein

rang-e-iKHlas-o-wafa kaifiyat-e-soz-o-gudaz

aur kya chiz sajaun tere armanon mein

phir meri aankhon mein lahraya tera KHwab-e-hasin

le chali nind mujhe tere shabistanon mein

zindagi chahe kahin kar le Thikana apna

ruh manDlati rahegi tere kashanon mein

ek nairang-e-junun-saz sada-e-paiham

hai ye andaz-e-kashish husn ke diwanon mein

aaj bahki hui duniya hai nigahon mein meri

jaane kya baat hai saqi tere paimanon mein

tha kahan hosh tere tishna-labon mein baqi

dil ka paimana liye rah gae mai-KHanon mein

chand ka phika tabassum gul-e-pazhmurda hi

raunaqen hain yahi baqi mere viranon mein