میرے جذبات کی رو جانے کہاں بہکی ہے (ردیف .. ن)

میرے جذبات کی رو جانے کہاں بہکی ہے

اب تو مشکل ہے چھپانا تجھے افسانوں میں

دل کا شعلہ تو بھڑکتا ہی رہا اشکوں سے

رات بھر شمع پگھلتی رہی پروانوں میں

رنگ اخلاص و وفا کیفیت سوز و گداز

اور کیا چیز سجاؤں ترے ارمانوں میں

پھر مری آنکھوں میں لہرایا ترا خواب حسیں

لے چلی نیند مجھے تیرے شبستانوں میں

زندگی چاہے کہیں کر لے ٹھکانا اپنا

روح منڈلاتی رہے گی ترے کاشانوں میں

ایک نیرنگ جنوں ساز صدائے پیہم

ہے یہ انداز کشش حسن کے دیوانوں میں

آج بہکی ہوئی دنیا ہے نگاہوں میں مری

جانے کیا بات ہے ساقی ترے پیمانوں میں

تھا کہاں ہوش ترے تشنہ لبوں میں باقی

دل کا پیمانہ لئے رہ گئے مے خانوں میں

چاند کا پھیکا تبسم گل پژمردہ ہی

رونقیں ہیں یہی باقی مرے ویرانوں میں