mere kashkol mein bas sikka-e-rad hai had hai

mere kashkol meñ bas sikka-e-rad hai had hai

phir bhī ye dil mirā rāzī-ba-madad hai had hai

ġham to haiñ baḳht ke bāzār meñ maujūd bahut

kāsa-e-jism meñ dil ek adad hai had hai

aaj ke daur kā insān ajab hai yārab

lab pe tārīf hai siine meñ hasad hai had hai

thā mirī pusht pe sūraj to ye ehsās huā

mujh se ūñchā to mire saa.e kā qad hai had hai

mustanad mo.atamad-e-dil nahīñ ab koī yahāñ

mahram-e-rāz bhī mahrūm-e-sanad hai had hai

maiñ to tasvīr-e-junūñ ban gayā hotā lekin

mujh ko roke hue bas pās-e-ḳhirad hai had hai

roz-e-avval hī meñ har had se guzar baiThā aur

chīḳhtā rah gayā hamdam mirā had hai had hai

kab talak ḳhāk-basar bhaTke bhalā bād-e-sabā

ab to har shāḳh pe phūloñ kī lahad hai had hai

rañg-e-iḳhlās bharūñ kaise marāsim meñ 'nadīm'

us kī niyyat bhī mirī tarah se bad hai had hai

mere kashkol mein bas sikka-e-rad hai had hai

phir bhi ye dil mera raazi-ba-madad hai had hai

gham to hain baKHt ke bazar mein maujud bahut

kasa-e-jism mein dil ek adad hai had hai

aaj ke daur ka insan ajab hai yarab

lab pe tarif hai sine mein hasad hai had hai

tha meri pusht pe suraj to ye ehsas hua

mujh se uncha to mere sae ka qad hai had hai

mustanad moatamad-e-dil nahin ab koi yahan

mahram-e-raaz bhi mahrum-e-sanad hai had hai

main to taswir-e-junun ban gaya hota lekin

mujh ko roke hue bas pas-e-KHirad hai had hai

roz-e-awwal hi mein har had se guzar baiTha aur

chiKHta rah gaya hamdam mera had hai had hai

kab talak KHak-basar bhaTke bhala baad-e-saba

ab to har shaKH pe phulon ki lahad hai had hai

rang-e-iKHlas bharun kaise marasim mein 'nadim'

us ki niyyat bhi meri tarah se bad hai had hai