mere KHayal se daman chhuDa liya hai to kya

mere ḳhayāl se dāman chhuḌā liyā hai to kyā

kahā ye kis ne ki bhūle se bhī salām na le

bharī bahār meñ phūloñ ke chāk-dāman haiñ

kise sazā mile gul to kisī kā naam na le

bahār kar ga.ī ḳhālī chaman ke āñchal ko

ḳhizāñ kā karb bhī dekho ki intiqām na le

ye chāñdnī hai kisī kī nigāh kā partav

nazar se pī le to hāthoñ meñ koī jaam na le

akelī rah meñ na do-gām bhī chalā jaa.e

jo shām-e-ġham tirī yādoñ kī uñglī thaam na le

ye kaun ruuh pe charke lagā gayā 'husnā'

qasam vafā kī tū us bevafā kā naam na le

mere KHayal se daman chhuDa liya hai to kya

kaha ye kis ne ki bhule se bhi salam na le

bhari bahaar mein phulon ke chaak-daman hain

kise saza mile gul to kisi ka nam na le

bahaar kar gai KHali chaman ke aanchal ko

KHizan ka karb bhi dekho ki intiqam na le

ye chandni hai kisi ki nigah ka partaw

nazar se pi le to hathon mein koi jam na le

akeli rah mein na do-gam bhi chala jae

jo sham-e-gham teri yaadon ki ungli tham na le

ye kaun ruh pe charke laga gaya 'husna'

qasam wafa ki tu us bewafa ka nam na le