mere lab pe hansi agar aai

mere lab pe hañsī agar aa.ī

to faqat apne haal par aa.ī

dāstān-e-hayāt likkhūñgā

zabt-e-tahrīr meñ agar aa.ī

be-ḳhudī ne ye mo.ajiza bhī kiyā

chhoḌne mujh ko mere ghar aa.ī

qābil-e-dīd the maqām sabhī

jin se ye zindagī guzar aa.ī

merī ḳhātir ye rahmat-e-yazdāñ

us bulandī se kyoñ utar aa.ī

ham na sajde se sar uThā.eñge

baat bantī agar nazar aa.ī

hech samjhā thā ham ne duniyā ko

ye bhī tohmat hamāre sar aa.ī

maut hī ke liye sahī 'rāhat'

ik duā to zabān par aa.ī

mere lab pe hansi agar aai

to faqat apne haal par aai

dastan-e-hayat likkhunga

zabt-e-tahrir mein agar aai

be-KHudi ne ye moajiza bhi kiya

chhoDne mujh ko mere ghar aai

qabil-e-did the maqam sabhi

jin se ye zindagi guzar aai

meri KHatir ye rahmat-e-yazdan

us bulandi se kyon utar aai

hum na sajde se sar uThaenge

baat banti agar nazar aai

hech samjha tha hum ne duniya ko

ye bhi tohmat hamare sar aai

maut hi ke liye sahi 'rahat'

ek dua to zaban par aai