میرے لب پہ ہنسی اگر آئی

میرے لب پہ ہنسی اگر آئی

تو فقط اپنے حال پر آئی

داستان حیات لکھوں گا

ضبط تحریر میں اگر آئی

بے خودی نے یہ معجزہ بھی کیا

چھوڑنے مجھ کو میرے گھر آئی

قابل دید تھے مقام سبھی

جن سے یہ زندگی گزر آئی

میری خاطر یہ رحمت یزداں

اس بلندی سے کیوں اتر آئی

ہم نہ سجدے سے سر اٹھائیں گے

بات بنتی اگر نظر آئی

ہیچ سمجھا تھا ہم نے دنیا کو

یہ بھی تہمت ہمارے سر آئی

موت ہی کے لئے سہی راحتؔ

اک دعا تو زبان پر آئی