mere marne ki bhi un ko na KHabar di jae

mere marne kī bhī un ko na ḳhabar dī jaa.e

kis liye apnoñ ko taklīf-e-safar dī jaa.e

laakh ko le ke chaleñ ġhair baḌī shaan ke saath

ghar se le jā ke ye chaurāhe pe dhar dī jaa.e

umr bhar tū ne atā kī hai mai-e-hosh-rubā

vaqt-e-āḳhir hai mai-e-hosh-asar dī jaa.e

sīm-o-zar se na sahī sabr-o-qanā.at se sahī

mujh se ḳhuddār kī jholī bhī to bhar dī jaa.e

ġham se ġham ho na ḳhushī se ho ḳhushī kā ehsās

aisī tadbīr bhī ai dil koī kar dī jaa.e

tab kahīñ jā ke mile manzil-e-irfāñ kā nishāñ

jab nigāhoñ ko zabāñ dil ko nazar dī jaa.e

dil ki hai kushta-e-bedād-e-falak ai 'sāhir'

is ko tābānī-e-ḳhurshīd-o-qamar dī jaa.e

mere marne ki bhi un ko na KHabar di jae

kis liye apnon ko taklif-e-safar di jae

lakh ko le ke chalen ghair baDi shan ke sath

ghar se le ja ke ye chaurahe pe dhar di jae

umr bhar tu ne ata ki hai mai-e-hosh-ruba

waqt-e-aKHir hai mai-e-hosh-asar di jae

sim-o-zar se na sahi sabr-o-qanaat se sahi

mujh se KHuddar ki jholi bhi to bhar di jae

gham se gham ho na KHushi se ho KHushi ka ehsas

aisi tadbir bhi ai dil koi kar di jae

tab kahin ja ke mile manzil-e-irfan ka nishan

jab nigahon ko zaban dil ko nazar di jae

dil ki hai kushta-e-bedad-e-falak ai 'sahir'

is ko tabani-e-KHurshid-o-qamar di jae