mere pahlu mein hai wo rashk-e-qamar aaj ki raat

mere pahlū meñ hai vo rashk-e-qamar aaj kī raat

jā ke ġhairoñ meñ rahe dard-e-jigar aaj kī raat

niiñd kā vasl meñ hogā na guzar aaj kī raat

rat-jagā aa ke karegī mire ghar aaj kī raat

kis ke ghar jā.egā vo rashk-e-qamar aaj kī raat

chāñd niklegā ḳhudā jaane kidhar aaj kī raat

ye shab-e-vasl shab-e-hijr se yā-rab baḌh jaa.e

roz fardā kī kabhī ho na sahar aaj kī raat

zulf kī aaḌ meñ dil le uḌī shoḳhī-e-nigāh

pā ga.ī DhūñDhtī thī jis ko nazar aaj kī raat

kaTne vaalī nazar aatī nahīñ ye hijr kī shab

ho nahīñ saktī kisī tarah basar aaj kī raat

na kisī samt se āvāz-e-azāñ aatī hai

boltā hai na kahīñ murġh-e-sahar aaj kī raat

ruḳhsat ai ziist ki shām-e-shab-e-ġham aatī hai

apnā is dār-e-fanā se hai safar aaj kī raat

zindagānī kā natīja hai yahī muddat-e-vasl

hāsil-e-umr haiñ ye chaar pahar aaj kī raat

mere pahlu mein hai wo rashk-e-qamar aaj ki raat

ja ke ghairon mein rahe dard-e-jigar aaj ki raat

nind ka wasl mein hoga na guzar aaj ki raat

rat-jaga aa ke karegi mere ghar aaj ki raat

kis ke ghar jaega wo rashk-e-qamar aaj ki raat

chand niklega KHuda jaane kidhar aaj ki raat

ye shab-e-wasl shab-e-hijr se ya-rab baDh jae

roz farda ki kabhi ho na sahar aaj ki raat

zulf ki aaD mein dil le uDi shoKHi-e-nigah

pa gai DhunDhti thi jis ko nazar aaj ki raat

kaTne wali nazar aati nahin ye hijr ki shab

ho nahin sakti kisi tarah basar aaj ki raat

na kisi samt se aawaz-e-azan aati hai

bolta hai na kahin murgh-e-sahar aaj ki raat

ruKHsat ai zist ki sham-e-shab-e-gham aati hai

apna is dar-e-fana se hai safar aaj ki raat

zindagani ka natija hai yahi muddat-e-wasl

hasil-e-umr hain ye chaar pahar aaj ki raat