mere qabze mein lab-kushai hai

mere qabze meñ lab-kushā.ī hai

ab asīrī nahīñ rihā.ī hai

bāb-e-gulshan khulā jo us se mile

gul-e-sad-barg āshnā.ī hai

ik musalsal safar meñ rahtā huuñ

mujh ko shauq-e-shikasta-pā.ī hai

zikr us kā rahegā mahshar tak

jis ne āvāz-e-haq sunā.ī hai

un kā dāman bhī aaj tar dekhā

vo jinheñ zo.am-e-pārsā.ī hai

manziloñ par pahuñch ke ruk jaanā

vajh-e-tauhīn-e-rahnumā.ī hai

ḳhvāb hai in se guftugū karnā

nā-rasā.ī sī nā-rasā.ī hai

kis qadar āshnā lagī hai 'zafar'

ik kaThin rahguzar jo aa.ī hai

mere qabze mein lab-kushai hai

ab asiri nahin rihai hai

bab-e-gulshan khula jo us se mile

gul-e-sad-barg aashnai hai

ek musalsal safar mein rahta hun

mujh ko shauq-e-shikasta-pai hai

zikr us ka rahega mahshar tak

jis ne aawaz-e-haq sunai hai

un ka daman bhi aaj tar dekha

wo jinhen zoam-e-parsai hai

manzilon par pahunch ke ruk jaana

wajh-e-tauhin-e-rahnumai hai

KHwab hai in se guftugu karna

na-rasai si na-rasai hai

kis qadar aashna lagi hai 'zafar'

ek kaThin rahguzar jo aai hai