mere rone par jo roya aadmi fahmida hai

mere rone par jo royā aadmī fahmīda hai

nāseh-e-āqil purānā gurg-e-bārāñ-dīda hai

maiñ bhī to dekhūñ nikaltā hai ye tinkā kis tarah

chārāgar kī aañkh meñ merā tan-e-kāhīda hai

tū ne rakkhā hai raqīb-e-tursh-rū ke dil pe haath

aaj kyoñ phīkā tirā dast-e-hinā-mālīda hai

ḳhaak meñ us ne milāyā mujh ko yā maiñ ne use

aaj maiñ huuñ aur ye merā dil-e-taftīda hai

zahr khā kar mil ga.e haiñ ḳhaak meñ āshiq bahut

uñgliyāñ haiñ dekh to yā sabza-e-roīda hai

ḳhuub aatā hai lagā lenā nigāh-e-yār ko

ek se an-ban huī to dūsrā girvīda hai

bahr-e-nazzāra chalā hai kūcha-e-qātil meñ 'dāġh'

kis balā kā hai kaleja kis ġhazab kā diida hai

mere rone par jo roya aadmi fahmida hai

naseh-e-aqil purana gurg-e-baran-dida hai

main bhi to dekhun nikalta hai ye tinka kis tarah

chaaragar ki aankh mein mera tan-e-kahida hai

tu ne rakkha hai raqib-e-tursh-ru ke dil pe hath

aaj kyon phika tera dast-e-hina-malida hai

KHak mein us ne milaya mujh ko ya main ne use

aaj main hun aur ye mera dil-e-taftida hai

zahr kha kar mil gae hain KHak mein aashiq bahut

ungliyan hain dekh to ya sabza-e-roida hai

KHub aata hai laga lena nigah-e-yar ko

ek se an-ban hui to dusra girwida hai

bahr-e-nazzara chala hai kucha-e-qatil mein 'dagh'

kis bala ka hai kaleja kis ghazab ka dida hai