mere sine par wo sar rakkhe hue sota raha

mere siine par vo sar rakkhe hue sotā rahā

jaane kyā thī baat maiñ jaagā kiyā rotā rahā

shabnamī meñ dhuup kī jaise vatan kā ḳhvāb thā

log ye samjhe maiñ sabze par paḌā sotā rahā

vādiyoñ meñ gaah utrā aur kabhī parbat chaḌhā

bojh sā ik dil pe rakkhā hai jise Dhotā rahā

gaah paanī gaah shabnam aur kabhī ḳhūnāb se

ek hī thā daaġh siine meñ jise dhotā rahā

ik havā-e-be-takāñ se āḳhirash murjhā gayā

zindagī bhar jo mohabbat ke shajar botā rahā

rone vāloñ ne uThā rakkhā thā ghar sar par magar

umr bhar kā jāgne vaalā paḌā sotā rahā

raat kī palkoñ pe tāroñ kī tarah jaagā kiyā

sub.h kī āñkhoñ meñ shabnam kī tarah rotā rahā

raushnī ko rañg kar ke le ga.e jis raat log

koī saaya mere kamre meñ chhupā rotā rahā

mere sine par wo sar rakkhe hue sota raha

jaane kya thi baat main jaga kiya rota raha

shabnami mein dhup ki jaise watan ka KHwab tha

log ye samjhe main sabze par paDa sota raha

wadiyon mein gah utra aur kabhi parbat chaDha

bojh sa ek dil pe rakkha hai jise Dhota raha

gah pani gah shabnam aur kabhi KHunab se

ek hi tha dagh sine mein jise dhota raha

ek hawa-e-be-takan se aaKHirash murjha gaya

zindagi bhar jo mohabbat ke shajar bota raha

rone walon ne uTha rakkha tha ghar sar par magar

umr bhar ka jagne wala paDa sota raha

raat ki palkon pe taron ki tarah jaga kiya

subh ki aankhon mein shabnam ki tarah rota raha

raushni ko rang kar ke le gae jis raat log

koi saya mere kamre mein chhupa rota raha