mere siwa sabhi ki thi yalghaar har taraf

mere sivā sabhī kī thī yalġhār har taraf

nādān sirf maiñ hī thā hushiyār har taraf

baaqī bachegā kuchh bhī na mujh ko nikāl ke

haiñ mere dam se sābit-o-sayyār har taraf

sab dil pe choT khaa.e haiñ sab ġham chhupā.e haiñ

āzār-e-'ishq ke haiñ gunahgār har taraf

bāzār-e-misr meñ koī yūsuf nahīñ hai ab

kis kī talāsh meñ haiñ ḳharīdār har taraf

qasr-e-anā ke taḳht kā sultān maiñ hī huuñ

maiñ ne hī ḳhud uThā.ī hai dīvār har taraf

bichh jaatī haiñ safeñ kī safeñ ran meñ chaar sū

jab ik taraf se kartā huuñ maiñ vaar har taraf

ḳhud chal ke koī jaatā nahīñ us ke naam par

baiThe sabhī haiñ jaane ko tayyār har taraf

mere siwa sabhi ki thi yalghaar har taraf

nadan sirf main hi tha hushiyar har taraf

baqi bachega kuchh bhi na mujh ko nikal ke

hain mere dam se sabit-o-sayyar har taraf

sab dil pe choT khae hain sab gham chhupae hain

aazar-e-'ishq ke hain gunahgar har taraf

bazar-e-misr mein koi yusuf nahin hai ab

kis ki talash mein hain KHaridar har taraf

qasr-e-ana ke taKHt ka sultan main hi hun

main ne hi KHud uThai hai diwar har taraf

bichh jati hain safen ki safen ran mein chaar su

jab ek taraf se karta hun main war har taraf

KHud chal ke koi jata nahin us ke nam par

baiThe sabhi hain jaane ko tayyar har taraf