mere tasawwuraat mein ab koi dusra nahin

mere tasavvurāt meñ ab koī dūsrā nahīñ

aap ko jāntā huuñ maiñ ġhair se vāstā nahīñ

dekh tū ai nigāh-e-dost kyā tujhe dil diyā nahīñ

kaun hai mujh se āshnā tū agar āshnā nahīñ

dil ko sukūn kar atā jaan ko baḳhsh de qarār

tere karam kī der hai dard ye lā-davā nahīñ

jis se na ho mirā guzar rah nahīñ tirī rahguzar

jis pe na merā sar jhuke vo tirā naqsh-e-pā nahīñ

chashm-e-karam kā shukriya pursish-e-ġham se fā.eda

kyā mirī bebasī kā haal aap par ā.īna nahīñ

ek hasīn ahd kī yaad dilā ke rah ga.ī

un kī nazar ne dil se aaj aur to kuchh kahā nahīñ

kyuuñ na karam ke vāste aap se iltijā karūñ

aap batā.eñ kyā mujhe aap kā aasrā nahīñ

dil meñ hai aks aap kā lab pe hai naam aap kā

aap kā 'muztar'-e-hazīñ aap ko bhūltā nahīñ

mere tasawwuraat mein ab koi dusra nahin

aap ko jaanta hun main ghair se wasta nahin

dekh tu ai nigah-e-dost kya tujhe dil diya nahin

kaun hai mujh se aashna tu agar aashna nahin

dil ko sukun kar ata jaan ko baKHsh de qarar

tere karam ki der hai dard ye la-dawa nahin

jis se na ho mera guzar rah nahin teri rahguzar

jis pe na mera sar jhuke wo tera naqsh-e-pa nahin

chashm-e-karam ka shukriya pursish-e-gham se faeda

kya meri bebasi ka haal aap par aaina nahin

ek hasin ahd ki yaad dila ke rah gai

un ki nazar ne dil se aaj aur to kuchh kaha nahin

kyun na karam ke waste aap se iltija karun

aap bataen kya mujhe aap ka aasra nahin

dil mein hai aks aap ka lab pe hai nam aap ka

aap ka 'muztar'-e-hazin aap ko bhulta nahin