meri aankhon mein aansu pyare

merī āñkhoñ meñ aañsū pyāre

ghar tumhārā hai tum raho pyāre

ġhair kī baat meñ na tum aanā

maiñ kahūñ aur tum suno pyāre

lutf-e-sohbat matā-e-ulfat hai

kuchh kaho aur kuchh suno pyāre

ik fareb-e-nazar hai kuchh bhī nahīñ

ye gulistān-e-rañg-o-bū pyāre

kaun kitnā vafā kā hai pāband

faisla hogā mū-ba-mū pyāre

hai tamannā tumhārī sab ko magar

tum ho aap apnī aarzū pyāre

ik mohabbat hai vo shikāyat bhī

jo kare koī rū-ba-rū pyāre

ham na chhoḌeñge sheva-e-taslīm

tum jo chāho vo tum karo pyāre

nām-levā tumhārā hai 'tarzī'

aadmī kī tarah milo pyāre

meri aankhon mein aansu pyare

ghar tumhaara hai tum raho pyare

ghair ki baat mein na tum aana

main kahun aur tum suno pyare

lutf-e-sohbat mata-e-ulfat hai

kuchh kaho aur kuchh suno pyare

ek fareb-e-nazar hai kuchh bhi nahin

ye gulistan-e-rang-o-bu pyare

kaun kitna wafa ka hai paband

faisla hoga mu-ba-mu pyare

hai tamanna tumhaari sab ko magar

tum ho aap apni aarzu pyare

ek mohabbat hai wo shikayat bhi

jo kare koi ru-ba-ru pyare

hum na chhoDenge shewa-e-taslim

tum jo chaho wo tum karo pyare

nam-lewa tumhaara hai 'tarzi'

aadmi ki tarah milo pyare