meri apnai hui qadron ne hi nocha mujhe

merī apnā.ī huī qadroñ ne hī nochā mujhe

tū ne kis tahzīb ke patthar se lā bāñdhā mujhe

maiñ ne sāhil par jalā diiñ maslahat kī kashtiyāñ

ab kisī kī bevafā.ī kā nahīñ khaTkā mujhe

dast-o-pā basta khaḌā huuñ pyaas ke sahrāoñ meñ

ai farāt-e-zindagī tū ne ye kyā baḳhshā mujhe

chand kirneñ jo mire kaase meñ haiñ un ke evaz

shab ke darvāze pe bhī denā paḌā pahrā mujhe

sāthiyo tum sāhiloñ par chain se so.e raho

le hī jā.egā kahīñ bahtā huā dariyā mujhe

meri apnai hui qadron ne hi nocha mujhe

tu ne kis tahzib ke patthar se la bandha mujhe

main ne sahil par jala din maslahat ki kashtiyan

ab kisi ki bewafai ka nahin khaTka mujhe

dast-o-pa basta khaDa hun pyas ke sahraon mein

ai faraat-e-zindagi tu ne ye kya baKHsha mujhe

chand kirnen jo mere kase mein hain un ke ewaz

shab ke darwaze pe bhi dena paDa pahra mujhe

sathiyo tum sahilon par chain se soe raho

le hi jaega kahin bahta hua dariya mujhe