meri baaten sun ke par sab panchhiyon ke jhaD gae

merī bāteñ sun ke par sab panchhiyoñ ke jhaḌ ga.e

ġham kī arzānī se patte Tahniyoñ ke saḌ ga.e

us kī manzil itnī mushkil thī batā.ūñ kyā tujhe

yaad aa.ī jab kabhī paañv pe chhāle paḌ ga.e

maiñ zarā sā hī rukā thā ik shajar ke saa.e meñ

dard ko mahsūs karke barg saare jhaḌ ga.e

'ilm jin ke paas thā so vo sarāpā 'ijz the

duur the mantiq se jo vo apnī zid par aḌ ga.e

zahr meñ kuchh is qadar Duube hue alfāz the

aa.ina dekhā to mere hoñT niile paḌ ga.e

apnī hī tahzīb ko ham dafn hotā dekh kar

sharm ke maare jahāñ the ham vahīñ par gaḌ ga.e

vo gale lag kar milā to maiñ ne ye dekhā 'shahāb'

ḳhālī āñkhoñ meñ mohabbat ke nagīne jaḌ ga.e

meri baaten sun ke par sab panchhiyon ke jhaD gae

gham ki arzani se patte Tahniyon ke saD gae

us ki manzil itni mushkil thi bataun kya tujhe

yaad aai jab kabhi panw pe chhaale paD gae

main zara sa hi ruka tha ek shajar ke sae mein

dard ko mahsus karke barg sare jhaD gae

'ilm jin ke pas tha so wo sarapa 'ijz the

dur the mantiq se jo wo apni zid par aD gae

zahr mein kuchh is qadar Dube hue alfaz the

aaina dekha to mere honT nile paD gae

apni hi tahzib ko hum dafn hota dekh kar

sharm ke mare jahan the hum wahin par gaD gae

wo gale lag kar mila to main ne ye dekha 'shahab'

KHali aankhon mein mohabbat ke nagine jaD gae