meri baaton pe KHamoshi ka guman hona tha

merī bātoñ pe ḳhamoshī kā gumāñ honā thā

kahāñ alfāz mujhe jin se bayāñ honā thā

jald-bāzī ne ye tartīb ulaT dī varna

ab jo sahrā hai use nahr-e-ravāñ honā thā

ḳhair achchhā huā bas tark-e-marāsim Thahrā

varna ye 'ishq bhī ehsās-e-ziyāñ honā thā

saath tum the to bahut aa.iiñ bahāreñ mujh par

aur bahāroñ ko bahar-hāl ḳhizāñ honā thā

jab un āñkhoñ ne dikhā.e the tamāshe mujh ko

phir tamāshoñ ko bhalā aur kahāñ honā thā

tajraba merā bhī kuchh aur baras baḌh jaatā

tumheñ kuchh aur baras ruk ke javāñ honā thā

ye jahāñ jaisā hai behtar hai magar jaane kyoñ

aisā lagtā hai ise aur jahāñ honā thā

meri baaton pe KHamoshi ka guman hona tha

kahan alfaz mujhe jin se bayan hona tha

jald-bazi ne ye tartib ulaT di warna

ab jo sahra hai use nahr-e-rawan hona tha

KHair achchha hua bas tark-e-marasim Thahra

warna ye 'ishq bhi ehsas-e-ziyan hona tha

sath tum the to bahut aain bahaaren mujh par

aur bahaaron ko bahar-haal KHizan hona tha

jab un aankhon ne dikhae the tamashe mujh ko

phir tamashon ko bhala aur kahan hona tha

tajraba mera bhi kuchh aur baras baDh jata

tumhein kuchh aur baras ruk ke jawan hona tha

ye jahan jaisa hai behtar hai magar jaane kyon

aisa lagta hai ise aur jahan hona tha