meri basti mein jo suraj kabhi utra hota

merī bastī meñ jo sūraj kabhī utrā hotā

maiñ badan hotā tirā to mirā saaya hotā

kis kī be-mehr adā se hameñ shikva hotā

ham kisī ke na hue kaun hamārā hotā

jaan par khel ke maiñ rāh-e-vafā tai kartā

us kī jānib se magar kuchh to ishāra hotā

dil kā ehsān hai jo bujh gayā ḳhud hī varna

jaane maiñ kis ko kahāñ DhūñDne niklā hotā

us ko paane kī to hasrat hai use pā kar bhī

kis ko ma.alūm hai dil yuuñ hī akelā hotā

duur se khīñchtā rahtā hai jo tasvīr mirī

kaash us ne kabhī nazdīk se dekhā hotā

sun ke yāroñ ke alam sochtā rahtā huuñ ki maiñ

kaise jiitā jo tirā pyaar bhī jhūTā hotā

mere aiboñ meñ hai shāmil mirī majbūrī bhī

maiñ bhī insān na hotā to farishta hotā

tum na aa.e kabhī nazdīk to achchhā hī kyā

log nādāñ haiñ yūñhī shahr meñ charchā hotā

duniyā-dārī meñ paḌe hote jo tum bhī 'anjum'

dil bhī ḳhush rahtā sadā naam bhī ūñchā hotā

meri basti mein jo suraj kabhi utra hota

main badan hota tera to mera saya hota

kis ki be-mehr ada se hamein shikwa hota

hum kisi ke na hue kaun hamara hota

jaan par khel ke main rah-e-wafa tai karta

us ki jaanib se magar kuchh to ishaara hota

dil ka ehsan hai jo bujh gaya KHud hi warna

jaane main kis ko kahan DhunDne nikla hota

us ko pane ki to hasrat hai use pa kar bhi

kis ko malum hai dil yun hi akela hota

dur se khinchta rahta hai jo taswir meri

kash us ne kabhi nazdik se dekha hota

sun ke yaron ke alam sochta rahta hun ki main

kaise jita jo tera pyar bhi jhuTa hota

mere aibon mein hai shamil meri majburi bhi

main bhi insan na hota to farishta hota

tum na aae kabhi nazdik to achchha hi kya

log nadan hain yunhi shahr mein charcha hota

duniya-dari mein paDe hote jo tum bhi 'anjum'

dil bhi KHush rahta sada nam bhi uncha hota