meri be-hauslagi is se siwa aur sahi

merī be-hauslagī is se sivā aur sahī

aur chāho to mohabbat kā silā aur sahī

yuuñ bhī kuchh kam to na the itnī bahāroñ ke hujūm

in meñ shāmil tire dāman kī havā aur sahī

mujh ko isrār kahāñ hai ki mohabbat jānūñ

aaj se ma.anī-o-andāz-o-adā aur sahī

talab-e-dard meñ dil had se guzartā kab thā

tum ne pūchhā thā ki aur is ne kahā aur sahī

ab to har shahr meñ us ke hī qasīde paḌhiye

vo jo pahle hī ḳhafā hai vo ḳhafā aur sahī

ham isī rahmat-o-zahmat ke haiñ aadī yārab

jaisī bhī hai isī duniyā kī fazā aur sahī

sabaq-e-be-gunahī tishna-e-takmīl bhī thā

ik nayā falsafa-e-jurm-o-sazā aur sahī

aaj aap apne mahāsin kā bayāñ kar liije

mahfil-e-tazkira-e-ahl-e-vafā aur sahī

kyā zarūrī hai ki andāz-e-bahārāñ rakkhe

ab jo kuchh aur hai raftār-e-sabā aur sahī

ab bahut shor sahī kal to koī parkhegā

in sadāoñ meñ faqīroñ kī navā aur sahī

kyuuñ na 'ālī' se alaa.ī pe ġhazal likhvā.e

ek bedādgar-e-ranj-fazā aur sahī

meri be-hauslagi is se siwa aur sahi

aur chaho to mohabbat ka sila aur sahi

yun bhi kuchh kam to na the itni bahaaron ke hujum

in mein shamil tere daman ki hawa aur sahi

mujh ko israr kahan hai ki mohabbat jaanun

aaj se mani-o-andaz-o-ada aur sahi

talab-e-dard mein dil had se guzarta kab tha

tum ne puchha tha ki aur is ne kaha aur sahi

ab to har shahr mein us ke hi qaside paDhiye

wo jo pahle hi KHafa hai wo KHafa aur sahi

hum isi rahmat-o-zahmat ke hain aadi yarab

jaisi bhi hai isi duniya ki faza aur sahi

sabaq-e-be-gunahi tishna-e-takmil bhi tha

ek naya falsafa-e-jurm-o-saza aur sahi

aaj aap apne mahasin ka bayan kar lije

mahfil-e-tazkira-e-ahl-e-wafa aur sahi

kya zaruri hai ki andaz-e-bahaaran rakkhe

ab jo kuchh aur hai raftar-e-saba aur sahi

ab bahut shor sahi kal to koi parkhega

in sadaon mein faqiron ki nawa aur sahi

kyun na 'ali' se alai pe ghazal likhwae

ek bedadgar-e-ranj-faza aur sahi