meri chashm-e-nam mein rawan-dawan meri zindagi ka azab tha

merī chashm-e-nam meñ ravāñ-davāñ mirī zindagī kā 'azāb thā

jise dekhte hī maiñ mar ga.ī vahī 'aks mahv-e-sarāb thā

mirī ‘umr-e-rafta kī ḳhair ho ki tire baġhair guzar ga.ī

jahāñ saañs lenā muhāl thā jahāñ ranj ḳhāna-ḳharāb thā

vahī surḳh lab vahī aa.ina vahī dasht dasht sī zindagī

mire chārāgar mire mehrbāñ yahī zindagī kā shabāb thā

mire ham-nashīñ mire ham-navā mire gird-o-pesh meñ kyā huā

nahīñ koī bhī mirā mubtalā tire naqsh-e-pā kā javāb thā

mire chār-sū thī udāsiyāñ mire gird-o-pesh meñ ranj the

jinheñ dekh dekh maiñ jī uThī koī ḳhūb-rū mirā ḳhvāb thā

yahāñ rang-o-bū meñ huā hai kyā koī dil-nashīñ nahīñ bach sakā

ka.ī ḳhvāb miTTī meñ mil ga.e mire paas jin kā hisāb thā

meri chashm-e-nam mein rawan-dawan meri zindagi ka 'azab tha

jise dekhte hi main mar gai wahi 'aks mahw-e-sarab tha

meri ‘umr-e-rafta ki KHair ho ki tere baghair guzar gai

jahan sans lena muhaal tha jahan ranj KHana-KHarab tha

wahi surKH lab wahi aaina wahi dasht dasht si zindagi

mere chaaragar mere mehrban yahi zindagi ka shabab tha

mere ham-nashin mere ham-nawa mere gird-o-pesh mein kya hua

nahin koi bhi mera mubtala tere naqsh-e-pa ka jawab tha

mere chaar-su thi udasiyan mere gird-o-pesh mein ranj the

jinhen dekh dekh main ji uThi koi KHub-ru mera KHwab tha

yahan rang-o-bu mein hua hai kya koi dil-nashin nahin bach saka

kai KHwab miTTi mein mil gae mere pas jin ka hisab tha