میری غزلوں کا ہر قافیہ مسترد

میری غزلوں کا ہر قافیہ مسترد

آپ ہوں سامنے آئنہ مسترد

جان بچ جائے تو حادثہ مسترد

سر پٹختی ہوا کا نشہ مسترد

شاعری واعری دیکھتا کون ہے

حسن جب تک نہ ہو شاعرہ مسترد

تو مرے ساتھ ہو اور دنیا بھی ہو

اس مثلث کا اک زاویہ مسترد

زندگی لاکھ قدموں میں پڑتی رہی

کر دیا اس کا ہر فیصلہ مسترد

تجھ پہ میرا یقیں اس قدر بے اٹل

ذہن و دل کا ہر اک وسوسہ مسترد

ہم ترے غم کی تلخی سے ہیں آشنا

اب نیا کوئی بھی ذائقہ مسترد

رب اکبر کا ہر فیصلہ دل کشا

جا نجومی ترا زائچہ مسترد