meri har fikr har ek soch ka mehwar tu hai

merī har fikr har ik soch kā mehvar tū hai

bas gayā hai mirī āñkhoñ meñ jo manzar tū hai

ye jo raqsāñ hai rag-o-pai meñ lahū kī mānind

ye koī aur nahīñ mere sitamgar tū hai

maiñ kahāñ zaat meñ apnī huuñ magar hazz-e-qalīl

mujh meñ ai jān-e-tamannā mirī aksar tū hai

jism par ḳhaar libāsoñ se chhilā jaatā hai

aa mire dost mujhe maḳhmalīñ astar tū hai

chār-sū DhūñDhtī phirtī haiñ nigāheñ tujh ko

mujh ko āvāz de kis jā mire dilbar tū hai

chāhateñ terī kisī aur se mansūb raheñ

phir mujhe kyoñ hai gumāñ merā muqaddar tū hai

jaane vaale ko kahāñ rok sakā hai koī

itnā ranjīda bhalā kis liye 'anvar' tū hai

meri har fikr har ek soch ka mehwar tu hai

bas gaya hai meri aankhon mein jo manzar tu hai

ye jo raqsan hai rag-o-pai mein lahu ki manind

ye koi aur nahin mere sitamgar tu hai

main kahan zat mein apni hun magar hazz-e-qalil

mujh mein ai jaan-e-tamanna meri aksar tu hai

jism par KHar libason se chhila jata hai

aa mere dost mujhe maKHmalin astar tu hai

chaar-su DhunDhti phirti hain nigahen tujh ko

mujh ko aawaz de kis ja mere dilbar tu hai

chahaten teri kisi aur se mansub rahen

phir mujhe kyon hai guman mera muqaddar tu hai

jaane wale ko kahan rok saka hai koi

itna ranjida bhala kis liye 'anwar' tu hai