meri inayaton ke talabgar aa gae

merī ināyatoñ ke talabgār aa ga.e

rahmat pukār uTThī gunahgār aa ga.e

ik lamha-e-sukūn milā muddatoñ ke baad

us ko bhī chhīnñe mire ġham-ḳhvār aa ga.e

ham nā-sipās log kahāñ jā ke ab raheñ

bastī meñ saare shahr ke hushiyār aa ga.e

ik shaḳhs kar rahā thā ġham-e-ishq kā ilaaj

hairat se dekhne use bīmār aa ga.e

be-manzarī shikasta-dilī khokhlī hañsī

ye shahr-e-ārzū hai to be-kār aa ga.e

do-chār hī qadam to chale chain se 'shamīm'

phir us ke baad rāste dushvār aa ga.e

meri inayaton ke talabgar aa gae

rahmat pukar uTThi gunahgar aa gae

ek lamha-e-sukun mila muddaton ke baad

us ko bhi chhinne mere gham-KHwar aa gae

hum na-sipas log kahan ja ke ab rahen

basti mein sare shahr ke hushiyar aa gae

ek shaKHs kar raha tha gham-e-ishq ka ilaj

hairat se dekhne use bimar aa gae

be-manzari shikasta-dili khokhli hansi

ye shahr-e-arzu hai to be-kar aa gae

do-chaar hi qadam to chale chain se 'shamim'

phir us ke baad raste dushwar aa gae