meri jaanib multafit sara jahan ho jaega

merī jānib multafit saarā jahāñ ho jā.egā

dil agar mehr-o-mohabbat kā makāñ ho jā.egā

sauñp do talvār pahle tum zarā mazlūm ko

dekhnā phir shahr meñ amn-o-amāñ ho jā.egā

imtiyāz-e-rang-o-bū kā ḳhātma jis din huā

phir yahī hindostāñ rashk-e-jināñ ho jā.egā

kyā zarūrī hai kareñ har shaḳhs se iz.hār-e-ġham

ḳhāmushī se mudda.ā ḳhud hī bayāñ ho jā.egā

dostoñ se tum na karnā inkishāf-e-rāz-e-dil

āshkārā varna phir rāz-e-nihāñ ho jā.egā

ho agar un ko pata 'mushtāq' hai mushtāq-e-dīd

āsmāñ ik aur zer-e-āsmāñ ho jā.egā

meri jaanib multafit sara jahan ho jaega

dil agar mehr-o-mohabbat ka makan ho jaega

saunp do talwar pahle tum zara mazlum ko

dekhna phir shahr mein amn-o-aman ho jaega

imtiyaz-e-rang-o-bu ka KHatma jis din hua

phir yahi hindostan rashk-e-jinan ho jaega

kya zaruri hai karen har shaKHs se izhaar-e-gham

KHamushi se muddaa KHud hi bayan ho jaega

doston se tum na karna inkishaf-e-raaz-e-dil

aashkara warna phir raaz-e-nihan ho jaega

ho agar un ko pata 'mushtaq' hai mushtaq-e-did

aasman ek aur zer-e-asman ho jaega