meri jaisi uski haalat kab hogi

merī jaisī us kī hālat kab hogī

us ko jaane mujh se mohabbat kab hogī

us ke liye maiñ ḳhud se laḌtā rahtā huuñ

us ke dil ko us se adāvat kab hogī

sab se hañs ke miltī hai vo jab dekho

vo merī hī sirf amānat kab hogī

us ke naam se kitnā maiñ badnām huā

vo rusvā ab merī badaulat kab hogī

maiñ us kī chāhat meñ kitnā TuuTā huuñ

ab us ko bhī merī hasrat kab hogī

mujh ko nazar-andāz vo kartī rahtī hai

us kī jaisī merī aadat kab hogī

hāl-e-dil ash.ār meñ us ko kahnā hai

dil mahfil meñ us kī sadārat kab hogī

mujh ko us se ḳhuub shikāyat hai lekin

us ko jaane mujh se shikāyat kab hogī

us kā naam maiñ letā rahtā huuñ har dam

mere naam kī us se tilāvat kab hogī

vo ġhāfil hai mujh se sang-dil yā-allāh

terī taraf se us ko hidāyat kab hogī

kab mujh se insāf karegā yā-maulā

mere haq meñ terī adālat kab hogī

roz-e-mahshar us ko dil kī kahnī hai

ye batlā.eñ aap qayāmat kab hogī

us kī hukūmat mere dil pe hai to phir

mere dil se mujh ko baġhāvat kab hogī

dam ghuTtā hai us kī qaid meñ rahne se

ye batlā 'irshād' zamānat kab hogī

meri jaisi us ki haalat kab hogi

us ko jaane mujh se mohabbat kab hogi

us ke liye main KHud se laDta rahta hun

us ke dil ko us se adawat kab hogi

sab se hans ke milti hai wo jab dekho

wo meri hi sirf amanat kab hogi

us ke nam se kitna main badnam hua

wo ruswa ab meri badaulat kab hogi

main us ki chahat mein kitna TuTa hun

ab us ko bhi meri hasrat kab hogi

mujh ko nazar-andaz wo karti rahti hai

us ki jaisi meri aadat kab hogi

haal-e-dil ashaar mein us ko kahna hai

dil mahfil mein us ki sadarat kab hogi

mujh ko us se KHub shikayat hai lekin

us ko jaane mujh se shikayat kab hogi

us ka nam main leta rahta hun har dam

mere nam ki us se tilawat kab hogi

wo ghafil hai mujh se sang-dil ya-allah

teri taraf se us ko hidayat kab hogi

kab mujh se insaf karega ya-maula

mere haq mein teri adalat kab hogi

roz-e-mahshar us ko dil ki kahni hai

ye batlaen aap qayamat kab hogi

us ki hukumat mere dil pe hai to phir

mere dil se mujh ko baghawat kab hogi

dam ghuTta hai us ki qaid mein rahne se

ye batla 'irshad' zamanat kab hogi