meri KHamosh mohabbat ki ye qimat di hai

merī ḳhāmosh mohabbat kī ye qīmat dī hai

us ne Thukrā ke mujhe dard kī daulat dī hai

aap ko bhuul sakūñ dil ko kahīñ bahlā.ūñ

aap kī yaad ne kab mujh ko ye mohlat dī hai

paas baiThūñ tere aur tujh ko hī dekhe jā.ūñ

merī āñkhoñ ko kahāñ itnī ijāzat dī hai

dardmandī se mohabbat se milūñ maiñ sab se

mere ajdād ne virse meñ ye fitrat dī hai

kaam auroñ ke maiñ aatī rahūñ marte dam tak

mere ḳhāliq ne mujhe jitnī bhī tāqat dī hai

kitnī dilkash hai hasīñ hai ye dhanak-rañg fazā

mausam-e-gul ko musavvir ne kyā rañgat dī hai

merī zulfoñ ko sañvāre merā āñchal jhūle

ai havā kis ne tujhe aaj ye jur.at dī hai

kyoñ mere saath hī royā hai merā ā.īna

nauhagar tū ne use kaun sī sūrat dī hai

terī duniyā meñ hai majrūh merī sāda-dilī

kyā isī vāste ye saada tabī.at dī hai

zaḳhm-e-dil bhar ga.e kuchh aur ināyat kar deñ

itnī sī baat hai sāhab jo yuuñ zahmat dī hai

mujh ko is dahr ke dozaḳh meñ jalāyā hai sadā

kahne ko qadmoñ ke nīche mere jannat dī hai

us ne mujh ko faqat ġham hī nahīñ baḳhshe haiñ

mere lahje ko junūñ soch ko vahshat dī hai

sab se miltā hai to hañs hañs ke sitam Dhātā hai

mere jazboñ ko kahāñ tū ne ye qurbat dī hai

tujh ko allāh bachā.e sadā nazar-e-bad se

tujh ko 'shahnāz' ḳhudā ne hasīñ sūrat dī hai

meri KHamosh mohabbat ki ye qimat di hai

us ne Thukra ke mujhe dard ki daulat di hai

aap ko bhul sakun dil ko kahin bahlaun

aap ki yaad ne kab mujh ko ye mohlat di hai

pas baiThun tere aur tujh ko hi dekhe jaun

meri aankhon ko kahan itni ijazat di hai

dardmandi se mohabbat se milun main sab se

mere ajdad ne wirse mein ye fitrat di hai

kaam auron ke main aati rahun marte dam tak

mere KHaliq ne mujhe jitni bhi taqat di hai

kitni dilkash hai hasin hai ye dhanak-rang faza

mausam-e-gul ko musawwir ne kya rangat di hai

meri zulfon ko sanware mera aanchal jhule

ai hawa kis ne tujhe aaj ye jurat di hai

kyon mere sath hi roya hai mera aaina

nauhagar tu ne use kaun si surat di hai

teri duniya mein hai majruh meri sada-dili

kya isi waste ye sada tabiat di hai

zaKHm-e-dil bhar gae kuchh aur inayat kar den

itni si baat hai sahab jo yun zahmat di hai

mujh ko is dahr ke dozaKH mein jalaya hai sada

kahne ko qadmon ke niche mere jannat di hai

us ne mujh ko faqat gham hi nahin baKHshe hain

mere lahje ko junun soch ko wahshat di hai

sab se milta hai to hans hans ke sitam Dhata hai

mere jazbon ko kahan tu ne ye qurbat di hai

tujh ko allah bachae sada nazar-e-bad se

tujh ko 'shahnaz' KHuda ne hasin surat di hai