meri KHizan to sabz hui is KHumar mein

merī ḳhizāñ to sabz huī is ḳhumār meñ

aane kā us ne va.ada kiyā hai bahār meñ

rakkhī huī hai laaj mirī mere ishq ne

varna to kyā rakhā huā hai intizār meñ

ghar bhī mujhe to dasht sā lagtā hai tere bin

lagtā nahīñ hai dil mirā ujḌe dayār meñ

ab jo sulūk tū kare ye zarf hai tirā

maiñ aa ga.ī huuñ aaj tire iḳhtiyār meñ

raushan na ho sakī kabhī ye shām-e-ġham mirī

maiñ ne jalā.e diip ka.ī e'tibār meñ

merī vafā ke zikr pe us kī vo ḳhāmushī

saare javāb mil ga.e is iḳhtisār meñ

dekhī to hogī raah mirī us ne bhī kabhī

aayā bhī hogā ashk mire chashm-e-yār meñ

dekhā hai maiñ ne mo.ajiza 'dilshād' aisā bhī

hañsne se us ke gul khile haiñ kunj-e-ḳhār meñ

meri KHizan to sabz hui is KHumar mein

aane ka us ne wada kiya hai bahaar mein

rakkhi hui hai laj meri mere ishq ne

warna to kya rakha hua hai intizar mein

ghar bhi mujhe to dasht sa lagta hai tere bin

lagta nahin hai dil mera ujDe dayar mein

ab jo suluk tu kare ye zarf hai tera

main aa gai hun aaj tere iKHtiyar mein

raushan na ho saki kabhi ye sham-e-gham meri

main ne jalae dip kai e'tibar mein

meri wafa ke zikr pe us ki wo KHamushi

sare jawab mil gae is iKHtisar mein

dekhi to hogi rah meri us ne bhi kabhi

aaya bhi hoga ashk mere chashm-e-yar mein

dekha hai main ne moajiza 'dilshad' aisa bhi

hansne se us ke gul khile hain kunj-e-KHar mein