میری خوبی سے نکھرنے نہیں دیتا مجھ کو

میری خوبی سے نکھرنے نہیں دیتا مجھ کو

جبر اس کا یہ ابھرنے نہیں دیتا مجھ کو

سانس لینے کی اجازت بھی نہیں دیتا ہے

اور جاں سے بھی گزرنے نہیں دیتا مجھ کو

تشنگی سے مری واقف وہ نہیں ہے شاید

چڑھتے دریا میں اترنے نہیں دیتا مجھ کو

اپنی قربت سے بھی محروم مجھے رکھتا ہے

سرد آہیں بھی تو بھرنے نہیں دیتا مجھ کو

ریزہ ریزہ تو کیا تیری انا نے لیکن

میرا پندار بکھرنے نہیں دیتا مجھ کو

وہ مرے سامنے آتا ہی نہیں سج دھج کر

آئنہ بن کے سنورنے نہیں دیتا مجھ کو

گل کے رخسار پہ اک پل کے لئے بھی شبنمؔ

دھوپ کا قہر ٹھہرنے نہیں دیتا مجھ کو