میری خواہش بہتا پانی

میری خواہش بہتا پانی

میری قسمت ٹھہرا پانی

گور میں قلزم کی جا سویا

کوہ کی گود کا کھیلا پانی

اس کی پیاس کی خاطر میں نے

پہروں اوک میں رکھا پانی

روتے ہیں جب ہو جاتا ہے

اپنے سر سے اونچا پانی

جس برتن میں ڈالو اس کو

ہو جاتا ہے ویسا پانی

کچی چھت پر ٹوٹ کے برسا

بے حس بہرا اندھا پانی

پایابی سے ہار نہ مانو

مل جائے گا گہرا پانی

اس نگری میں دام نہ پوچھو

سستا خون ہے مہنگا پانی

اپنے عکس سے شرمندہ ہیں

پانی ہم کو کر گیا پانی