میری مایوس نظروں کو ترا دیدار ہو جائے

میری مایوس نظروں کو ترا دیدار ہو جائے

تو یہ سوئی ہوئی تقدیر پھر بیدار ہو جائے

قیامت کی کشش ہے تجھ میں جو بھی اک نظر دیکھے

وہ تجھ پر جان دینے کے لئے تیار ہو جائے

ترا غم ہے متاع زیست یہ میں بھی سمجھتا ہوں

مگر وہ کیا کرے جو زیست سے بیزار ہو جائے

تمہارے در پہ میں کب سے لگائے آس بیٹھا ہوں

ادھر بھی اک نگاہ لطف اے سرکار ہو جائے

اڑاتے ہو ہنسی فیاضؔ تم میری محبت کی

مری صورت تمہیں بھی عشق کا آزار ہو جائے