meri mayus nazron ko tera didar ho jae

merī māyūs nazroñ ko tirā dīdār ho jaa.e

to ye soī huī taqdīr phir bedār ho jaa.e

qayāmat kī kashish hai tujh meñ jo bhī ik nazar dekhe

vo tujh par jaan dene ke liye tayyār ho jaa.e

tirā ġham hai matā-e-zīst ye maiñ bhī samajhtā huuñ

magar vo kyā kare jo ziist se bezār ho jaa.e

tumhāre dar pe maiñ kab se lagā.e aas baiThā huuñ

idhar bhī ik nigāh-e-lutf ai sarkār ho jaa.e

uḌāte ho hañsī 'fayyāz' tum merī mohabbat kī

mirī sūrat tumheñ bhī ishq kā āzār ho jaa.e

meri mayus nazron ko tera didar ho jae

to ye soi hui taqdir phir bedar ho jae

qayamat ki kashish hai tujh mein jo bhi ek nazar dekhe

wo tujh par jaan dene ke liye tayyar ho jae

tera gham hai mata-e-zist ye main bhi samajhta hun

magar wo kya kare jo zist se bezar ho jae

tumhaare dar pe main kab se lagae aas baiTha hun

idhar bhi ek nigah-e-lutf ai sarkar ho jae

uDate ho hansi 'fayyaz' tum meri mohabbat ki

meri surat tumhein bhi ishq ka aazar ho jae