meri mahfil tha meri KHalwat-e-jaan tha kya tha

merī mahfil thā mirī ḳhalvat-e-jāñ thā kyā thā

vo ajab shaḳhs thā ik rāz-e-nihāñ thā kyā thā

baal khole hue phirtī thiiñ hasīnā.eñ kuchh

vasl thā yā ki judā.ī kā samāñ thā kyā thā

haa.e us shoḳh ke khul paa.e na asrār kabhī

jaane vo shaḳhs yaqīñ thā ki gumāñ thā kyā thā

tum jise markazī kirdār samajh baiThe ho

vo fasāne meñ agar thā to kahāñ thā kyā thā

kyuuñ 'vasī'-shāh pe parī-zādiyāñ jaañ detī haiñ

māh-e-kan.ān thā shā.ir thā javāñ thā kyā thā

meri mahfil tha meri KHalwat-e-jaan tha kya tha

wo ajab shaKHs tha ek raaz-e-nihan tha kya tha

baal khole hue phirti thin hasinaen kuchh

wasl tha ya ki judai ka saman tha kya tha

hae us shoKH ke khul pae na asrar kabhi

jaane wo shaKHs yaqin tha ki guman tha kya tha

tum jise markazi kirdar samajh baiThe ho

wo fasane mein agar tha to kahan tha kya tha

kyun 'wasi'-shah pe pari-zadiyan jaan deti hain

mah-e-kanan tha shair tha jawan tha kya tha