میری پرسش کو عدو ساتھ نہ لاؤ جاؤ

میری پرسش کو عدو ساتھ نہ لاؤ جاؤ

مجھ ستم دیدہ پہ یوں ظلم نہ ڈھاؤ جاؤ

کوئی دربار نہ دربان نہ آداب شہی

یہ تو اک خانۂ درویش ہے آؤ جاؤ

زندگی بھر تو کبھی تم نے دلاسا نہ دیا

کیوں مرے مرنے پہ اب آئے ہو جاؤ جاؤ

اے دلیران جہاں گیر جھجکتے کیوں ہو

کچھ ہنر عشق کے میداں میں دکھاؤ جاؤ

گنبد ذات سے نکلو کہ خداؤں کے خلاف

سب ہیں فریاد کناں ان کو بچاؤ جاؤ

وہ جو احباب کی ہیں نیش زنی کے منکر

آستینوں کے انہیں سانپ دکھاؤ جاؤ

ذکر جاناں ہی میں کہہ دو غم دوراں راہیؔ

رنگ محفل میں الگ اپنا جماؤ جاؤ