meri pursish ko adu sath na lao jao

merī pursish ko 'adū saath na laao jaao

mujh sitam-dīda pe yuuñ zulm na Dhaao jaao

koī darbār na darbān na ādāb-e-shahī

ye to ik ḳhāna-e-darvesh hai aao jaao

zindagī bhar to kabhī tum ne dilāsā na diyā

kyoñ mire marne pe ab aa.e ho jaao jaao

ai dilerān-e-jahāñ-gīr jhijakte kyoñ ho

kuchh hunar 'ishq ke maidāñ meñ dikhāo jaao

ġhumbad-e-zāt se niklo ki ḳhudāoñ ke ḳhilāf

sab haiñ fariyād-kunāñ un ko bachāo jaao

vo jo ahbāb kī haiñ nesh-zanī ke munkir

āstīnoñ ke unheñ saañp dikhāo jaao

zikr-e-jānāñ hī meñ kah do ġham-e-daurāñ 'rāhī'

rang mahfil meñ alag apnā jamāo jaao

meri pursish ko 'adu sath na lao jao

mujh sitam-dida pe yun zulm na Dhao jao

koi darbar na darban na aadab-e-shahi

ye to ek KHana-e-darwesh hai aao jao

zindagi bhar to kabhi tum ne dilasa na diya

kyon mere marne pe ab aae ho jao jao

ai dileran-e-jahan-gir jhijakte kyon ho

kuchh hunar 'ishq ke maidan mein dikhao jao

ghumbad-e-zat se niklo ki KHudaon ke KHilaf

sab hain fariyaad-kunan un ko bachao jao

wo jo ahbab ki hain nesh-zani ke munkir

aastinon ke unhen sanp dikhao jao

zikr-e-jaanan hi mein kah do gham-e-dauran 'rahi'

rang mahfil mein alag apna jamao jao