meri sanson se yun aae bhini bhini aag ki KHushbu

merī sāñsoñ se yuuñ aa.e bhīnī bhīnī aag kī ḳhushbū

jogī kī dhūnī se jaise uḌtī hai bairāg kī ḳhushbū

maañ kā haath pakaḌ kar jis se ho kar maile jaate the

mahuvā ke us baaġh se aa.e maañ ke surīle raag kī ḳhushbū

maañ kī gujhiyā mīThe pārle puurī aur kachauḌī soñdhī

phīkī holī yaad dilā.e Tesū vaale phaag kī ḳhushbū

jis meñ tū ne haath the dho.e kachche duudh sā mahke hai

terī ḳhushbū se miltī hai jharne ke is jhaag kī ḳhushbū

sab ke chūlhe alag alag haiñ jab se ammāñ guzrī haiñ

ujḌe chauke se aatī hai ammāñ vaale saag kī ḳhushbū

meri sanson se yun aae bhini bhini aag ki KHushbu

jogi ki dhuni se jaise uDti hai bairag ki KHushbu

man ka hath pakaD kar jis se ho kar maile jate the

mahuwa ke us bagh se aae man ke surile rag ki KHushbu

man ki gujhiya miThe parle puri aur kachauDi sondhi

phiki holi yaad dilae Tesu wale phag ki KHushbu

jis mein tu ne hath the dhoe kachche dudh sa mahke hai

teri KHushbu se milti hai jharne ke is jhag ki KHushbu

sab ke chulhe alag alag hain jab se amman guzri hain

ujDe chauke se aati hai amman wale sag ki KHushbu