meri sahar sahar na meri sham sham hai

merī sahar sahar na mirī shaam shaam hai

maiñ vo kitāb huuñ jo abhī nā-tamām hai

duniyā hai ye yahāñ kā ajab intizām hai

ġham ko qiyām hai na ḳhushī ko qiyām hai

thoḌā sā justujū-e-nazar terā kaam hai

jalva kisī kā aam na hone pe aam hai

un kī nazar meñ apnī jagah pā rahe haiñ ham

shāyad isī kā naam fareb-e-tamām hai

jis meñ sharīk hoñ na tirī mehrbāniyāñ

us zindagī ko duur se merā salām hai

piine se qabl hosh kī bāteñ gunāh haiñ

piine ke ba.ad hosh gañvānā harām hai

shak kar rahe haiñ log mire is yaqīn par

insāniyat mohabbat-e-insāñ kā naam hai

jo bhī qadam uThāo vo samjhā huā uThāo

nākām inqalāb baġhāvat kā naam hai

nā-āqebat-shanāsī-e-duniyā to dekhiye

thoḌī sī zindagī kā baḌā ehtimām hai

meri sahar sahar na meri sham sham hai

main wo kitab hun jo abhi na-tamam hai

duniya hai ye yahan ka ajab intizam hai

gham ko qiyam hai na KHushi ko qiyam hai

thoDa sa justuju-e-nazar tera kaam hai

jalwa kisi ka aam na hone pe aam hai

un ki nazar mein apni jagah pa rahe hain hum

shayad isi ka nam fareb-e-tamam hai

jis mein sharik hon na teri mehrbaniyan

us zindagi ko dur se mera salam hai

pine se qabl hosh ki baaten gunah hain

pine ke baad hosh ganwana haram hai

shak kar rahe hain log mere is yaqin par

insaniyat mohabbat-e-insan ka nam hai

jo bhi qadam uThao wo samjha hua uThao

nakaam inqalab baghawat ka nam hai

na-aqebat-shanasi-e-duniya to dekhiye

thoDi si zindagi ka baDa ehtimam hai