meri surat ko dekho kuchh na puchho majra mera

merī sūrat ko dekho kuchh na pūchho mājrā merā

ki jo guzrī hai mujh par ḳhuub vāqif hai ḳhudā merā

nishān-e-pā se chaltā hai patā talvoñ ke chhāloñ kā

jamā hai dasht meñ bhī duur tak naqsh-e-vafā merā

qafas meñ ek bīmār-e-mohabbat jaan detā hai

chaman vāloñ se ye paiġhām kah denā sabā merā

merī nākāmī-e-ummīd bhī hai rahm ke qābil

maiñ vo māyūs huuñ uThtā nahīñ dast-e-duā merā

mujhī par aaj paḌtī haiñ nigāheñ ahl-e-mahfil kī

tumhārī bazm meñ aisā jamā rang-e-vafā merā

dil-e-betāb siine meñ taḌap kar un se kahtā hai

tumhārī hasrateñ roke hue haiñ rāsta merā

balā se phir na aanā aaj kah do kal ham ā.eñge

isī meñ ḳhairiyat hai tum na toḌo aasrā merā

dam-e-āḳhir jo aa.e haiñ to marne bhī nahīñ dete

mujhe vo yaad dilvāte haiñ paimān-e-vafā merā

ise kahnā ḳhudā se kuchh na kuchh kahnā hasīnoñ se

maze kī chiiz hai 'safdar' dil-e-be-mudda.ā merā

meri surat ko dekho kuchh na puchho majra mera

ki jo guzri hai mujh par KHub waqif hai KHuda mera

nishan-e-pa se chalta hai pata talwon ke chhaalon ka

jama hai dasht mein bhi dur tak naqsh-e-wafa mera

qafas mein ek bimar-e-mohabbat jaan deta hai

chaman walon se ye paigham kah dena saba mera

meri nakaami-e-ummid bhi hai rahm ke qabil

main wo mayus hun uThta nahin dast-e-dua mera

mujhi par aaj paDti hain nigahen ahl-e-mahfil ki

tumhaari bazm mein aisa jama rang-e-wafa mera

dil-e-betab sine mein taDap kar un se kahta hai

tumhaari hasraten roke hue hain rasta mera

bala se phir na aana aaj kah do kal hum aaenge

isi mein KHairiyat hai tum na toDo aasra mera

dam-e-aKHir jo aae hain to marne bhi nahin dete

mujhe wo yaad dilwate hain paiman-e-wafa mera

ise kahna KHuda se kuchh na kuchh kahna hasinon se

maze ki chiz hai 'safdar' dil-e-be-muddaa mera