meri surat saya-e-diwar-o-dar mein kaun hai

merī sūrat sāya-e-dīvār-o-dar meñ kaun hai

ai junūñ mere sivā ye mere ghar meñ kaun hai

Thiik hai ai zabt-e-ġham! aañsū koī Tapkā nahīñ

par ye dil se aañkh tak paiham safar meñ kaun hai

vo to kab kā apnī manzil par pahuñch kar so chukā

chāñd kyā jaane ki rāh-e-pur-ḳhatar meñ kaun hai

maiñ to us sūrat kā dīvāna huuñ par ai zindagī!

sūrat-e-yak-umr haa.il sañg o sar meñ kaun hai

ḳhaak chhanvātī hai ye rātoñ ko kis kī justujū

chāñdnī kī tarah phailā dasht o dar meñ kaun hai

ek chehra mustaqil ashkoñ ke ā.īne meñ hai

kuchh batā ai umr-e-ġham āḳhir nazar meñ kaun hai

paañv meñ lipTī huī hai sab ke zanjīr-e-anā

sab musāfir haiñ yahāñ lekin safar meñ kaun hai

naġhma-e-jāñ sunñe vaalo ye takalluf tā-ba-kai

Dhā ke ye dīvār bhī dekho ki ghar meñ kaun hai

meri surat saya-e-diwar-o-dar mein kaun hai

ai junun mere siwa ye mere ghar mein kaun hai

Thik hai ai zabt-e-gham! aansu koi Tapka nahin

par ye dil se aankh tak paiham safar mein kaun hai

wo to kab ka apni manzil par pahunch kar so chuka

chand kya jaane ki rah-e-pur-KHatar mein kaun hai

main to us surat ka diwana hun par ai zindagi!

surat-e-yak-umr hail sang o sar mein kaun hai

KHak chhanwati hai ye raaton ko kis ki justuju

chandni ki tarah phaila dasht o dar mein kaun hai

ek chehra mustaqil ashkon ke aaine mein hai

kuchh bata ai umr-e-gham aaKHir nazar mein kaun hai

panw mein lipTi hui hai sab ke zanjir-e-ana

sab musafir hain yahan lekin safar mein kaun hai

naghma-e-jaan sunne walo ye takalluf ta-ba-kai

Dha ke ye diwar bhi dekho ki ghar mein kaun hai