meri surat se wo anjaan bhi ho sakta hai

merī sūrat se vo anjān bhī ho saktā hai

mere milne se vo hairān bhī ho saktā hai

tum to har baat meñ DhūñDo ho munāfa lekin

is mohabbat meñ to nuqsān bhī ho saktā hai

muskurāte hue phūloñ kī nazākat pe na jā

koī andar se pareshān bhī ho saktā hai

bevafā jis ko sar-e-bazm kahe jaate ho

vo tire ishq meñ qurbān bhī ho saktā hai

aaj jis shaḳhs ke shikve haiñ tire hoñToñ par

kal yahī shaḳhs tirī jaan bhī ho saktā hai

ye zarūrī to nahīñ ishq ho dillī meñ faqat

shahr-e-mahbūb to multān bhī ho saktā hai

dekho uljho nahīñ darvesh se hargiz logo

varna phir shahr ye vīrān bhī ho saktā hai

ab jo pahne hue guzrā hai faqīroñ sā libās

ye ga.e vaqt kā sultān bhī ho saktā hai

tum jise daar pe le aa.e ho kāfir kah kar

ye to bechāra musalmān bhī ho saktā hai

hai jo ġhunchoñ se bharā aap kā gulshan 'faisal'

ishq meñ ye to bayābān bhī ho saktā hai

meri surat se wo anjaan bhi ho sakta hai

mere milne se wo hairan bhi ho sakta hai

tum to har baat mein DhunDo ho munafa lekin

is mohabbat mein to nuqsan bhi ho sakta hai

muskuraate hue phulon ki nazakat pe na ja

koi andar se pareshan bhi ho sakta hai

bewafa jis ko sar-e-bazm kahe jate ho

wo tere ishq mein qurban bhi ho sakta hai

aaj jis shaKHs ke shikwe hain tere honTon par

kal yahi shaKHs teri jaan bhi ho sakta hai

ye zaruri to nahin ishq ho dilli mein faqat

shahr-e-mahbub to multan bhi ho sakta hai

dekho uljho nahin darwesh se hargiz logo

warna phir shahr ye viran bhi ho sakta hai

ab jo pahne hue guzra hai faqiron sa libas

ye gae waqt ka sultan bhi ho sakta hai

tum jise dar pe le aae ho kafir kah kar

ye to bechaara musalman bhi ho sakta hai

hai jo ghunchon se bhara aap ka gulshan 'faisal'

ishq mein ye to bayaban bhi ho sakta hai