میری تقدیر کو کچھ اور نکھر جانے دے

میری تقدیر کو کچھ اور نکھر جانے دے

ٹھہر اے کاتب تقدیر سنور جانے دے

دم تو لے گردش ایام ستم کیوں اتنا

منزل عشق کو بس پار تو کر جانے دے

دیکھنے والوں پہ پابندیٔ دیدار ہے کیوں

رخ مہتاب نما تک تو نظر جانے دے

اشک آنکھوں سے نکلنے کو مچلتے ہیں مرے

چشم محزوں کے یہ موتی ہیں بکھر جانے دے

کالی بدلی میں نظر آنے دے مہتاب ذرا

زلف پر پیچ سے شانوں کو سنور جانے دے

زخم گہرے ابھی کھانے کی ہے طاقت باقی

تیر جتنے ہیں پئے قلب و جگر جانے دے

شب تاریک میں مدت سے بھٹکتا ہے اسدؔ

یک قدم اس کو ذرا سوئے سحر جانے دے