میری تقدیر رہ گئی سوئی

میری تقدیر رہ گئی سوئی

التجا کر کے بات بھی کھوئی

دیکھ کر گلستاں کی بربادی

غم سے شبنم بھی رات بھر روئی

سرد مہری کے اس زمانے میں

کون کرتا ہے کس کی دل جوئی

الاماں دوپہر کی یہ گرمی

دھوپ بھی جا کے چھاؤں میں سوئی

بو کے کانٹے گلاب کون چنے

آگے آتی ہے اپنی ہی بوئی

اجلے اجلے وہ آج لگتے ہیں

ماش کی دال جس طرح دھوئی

ایک سے ایک آج اینٹھا ہے

خوش نہیں ہے کسی سے اب کوئی

سوز پرواز دیکھ کر ارشدؔ

شمع جل جل کے تا سحر روئی