میری وفا نہ دیکھ تو اپنی عطا شمار کر

میری وفا نہ دیکھ تو اپنی عطا شمار کر

آپ ہی شرمسار ہو یا مجھے شرمسار کر

پردۂ شب سے پو پھٹی صبح کو پر وقار کر

قلب و نظر کو دے جلا بخت کو تابدار کر

سن لے پیام سال نو اور نہ انتظار کر

ہوش و خرد کو دے صدا وقت کو سازگار کر

محو فغان آرزو ہوش سے ہمکنار کر

نغمۂ نوبہار سے زیست کو پر بہار کر

غم کی صدا جو آ گئی بزم طرب میں ہے مخل

غیرت حسن ہے اگر عشق سے ہم کنار کر

عیش و نشاط خود بخود قدموں پہ سر جھکائیں گے

آتش غم کو دے ہوا آہ کو شعلہ زار کر

تجھ کو اگر یقیں ہے یہ منصف و حق نگر ہے وہ

شکوۂ جور ہم نفس شوق سے بار بار کر

خواب سے جاگ ناصحا شمس عمل ہوا طلوع

خود کو بنا وفا نما کار صد افتخار کر

علویؔٔ زار ترک کر آہ و فغاں کا سلسلہ

جس سے سکوں نصیب ہو راہ وہ اختیار کر