meri wahshat ka tere shahr mein charcha hoga

merī vahshat kā tire shahr meñ charchā hogā

ab mujhe dekh ke shāyad tujhe dhokā hogā

saaf rasta hai chale aao sū-e-dīda-o-dil

aql kī raah se aaoge to pherā hogā

kaun samjhegā bhalā husn-e-gurezāñ kī adā

mere iisā ne mirā haal na pūchhā hogā

vaj.h-e-be-rañgī-e-har-shām-o-sahar kyā hogī

maiñ ne shāyad tujhe har rañg meñ dekhā hogā

ab kahīñ tū hī Dubove hameñ ai mauj-e-sarāb

varna phir shikva-e-pāyābi-e-dariyā hogā

koī tadbīr batā ai dil-e-āzār-pasand

us ko jī-jāñ se bhulāne meñ to arsa hogā

husn kī ḳhalvat-e-sāda bhī hai sad-bazm-tarāz

ishq mahfil meñ bhī hogā to akelā hogā

jhuTpuTā chhāyā hai kaun aayā hai darvāze par

dekhnā 'shāz' koī sub.h kā bhūlā hogā

meri wahshat ka tere shahr mein charcha hoga

ab mujhe dekh ke shayad tujhe dhoka hoga

saf rasta hai chale aao su-e-dida-o-dil

aql ki rah se aaoge to phera hoga

kaun samjhega bhala husn-e-gurezan ki ada

mere isa ne mera haal na puchha hoga

wajh-e-be-rangi-e-har-sham-o-sahar kya hogi

main ne shayad tujhe har rang mein dekha hoga

ab kahin tu hi Dubowe hamein ai mauj-e-sarab

warna phir shikwa-e-payabi-e-dariya hoga

koi tadbir bata ai dil-e-azar-pasand

us ko ji-jaan se bhulane mein to arsa hoga

husn ki KHalwat-e-sada bhi hai sad-bazm-taraaz

ishq mahfil mein bhi hoga to akela hoga

jhuTpuTa chhaya hai kaun aaya hai darwaze par

dekhna 'shaz' koi subh ka bhula hoga