میری وحشت مجھ سے پوچھے گی تو بتلاؤں گا میں

میری وحشت مجھ سے پوچھے گی تو بتلاؤں گا میں

سوانگ جو تم نے سکھائے وہ بھی دکھلاؤں گا میں

کس نے دیوانہ بنایا نام بتلاؤں گا میں

دشت و دریا سے بھی آگے بات پھیلاؤں گا میں

خواب تم دکھلاؤ گے تو خواب دکھلاؤں گا میں

دونوں جانب خواب کے پرچم بھی لہراؤں گا میں

نارسائی کا کوئی شکوہ نہیں شکوہ یہ ہے

کیا خیال خام ہی سے دل کو بہلاؤں گا میں

اے شب فرقت تمہیں مجھ سے شکایت تو نہیں

گر چلے جاؤ گے تم بھی کتنا گھبراؤں گا میں

اک سموم گرد آسا چل رہی ہے چار سو

چار سو بارش لیے تم دیکھنا آؤں گا میں

اک اندھیرا چار جانب بارشوں کے درمیاں

بارشوں کے درمیاں شعلہ سا لہراؤں گا میں

پاؤں ہیں آمادۂ سیر و سفر منزل بہ دست

کیا تمہیں لگتا ہے اب بھی لوٹ کر آؤں گا میں

راستے مسدود جب ہو جائیں گے ختم سفر

آخری پتھر پہ اپنا نام لکھواؤں گا میں

رفتگاں آئندگاں کے درمیاں کیا ربط ہے

میرؔ صاحب سے یہ پوچھوں گا تو بتلاؤں گا میں