میری زندگی کا ہے انحصار گل و سمن کے نکھار پر

میری زندگی کا ہے انحصار گل و سمن کے نکھار پر

میں چمن میں چاہے جہاں رہوں میرا حق ہے فصل بہار پر

ہے جنوں بھی چاک قبا بھی ہے وہی قید و بند کی سختیاں

ہے زمانے بھر کے ستم روا مری ایک ذات فگار پر

مرا باغ خار نگاہ شب مرا شہر سب کی نظر میں ہے

جو بلا چلی تو ٹھہر گئی اسی ایک اجڑے دیار پر

رہی وقف غم مری زندگی مگر ایک بات کی ہے خوشی

کہ مری حیات کا قافلہ چلا سمت جلوۂ یار پر

مرا دل اداس ہے شادؔ زاغ و زغن کے شور کے درمیاں

مری آنکھ چشمۂ خوں ہوئی ہے چمن کی حالت زار پر