meri zindagi ka hai inhisar gul-o-saman ke nikhaar par

merī zindagī kā hai inhisār gul-o-saman ke nikhār par

maiñ chaman meñ chāhe jahāñ rahūñ merā haq hai fasl-e-bahār par

hai junūñ bhī chāk-e-qabā bhī hai vahī qaid-o-band kī saḳhtiyāñ

hai zamāne bhar ke sitam ravā mirī ek zāt-e-figār par

mirā baaġh ḳhār-e-nigāh-e-shab mirā shahr sab kī nazar meñ hai

jo balā chalī to Thahar ga.ī isī ek ujḌe dayār par

rahī vaqf-e-ġham mirī zindagī magar ek baat kī hai ḳhushī

ki mirī hayāt kā qāfila chalā samt-e-jalva-e-yār par

mirā dil udaas hai 'shād' zāġh-o-zaġhan ke shor ke darmiyāñ

mirī aañkh chashma-e-ḳhūñ huī hai chaman kī hālat-e-zār par

meri zindagi ka hai inhisar gul-o-saman ke nikhaar par

main chaman mein chahe jahan rahun mera haq hai fasl-e-bahaar par

hai junun bhi chaak-e-qaba bhi hai wahi qaid-o-band ki saKHtiyan

hai zamane bhar ke sitam rawa meri ek zat-e-figar par

mera bagh KHar-e-nigah-e-shab mera shahr sab ki nazar mein hai

jo bala chali to Thahar gai isi ek ujDe dayar par

rahi waqf-e-gham meri zindagi magar ek baat ki hai KHushi

ki meri hayat ka qafila chala samt-e-jalwa-e-yar par

mera dil udas hai 'shad' zagh-o-zaghan ke shor ke darmiyan

meri aankh chashma-e-KHun hui hai chaman ki haalat-e-zar par