میز پر رکھی ہوئی دنیا میں خود کو ڈھونڈھتا تھا

میز پر رکھی ہوئی دنیا میں خود کو ڈھونڈھتا تھا

علم کے نشے میں تھا ٹھوکر پہ ٹھوکر کھا رہا تھا

اس نے اک وسعت بھری نظروں سے بوسہ کیا لیا تھا

میں تھا چاروں سمت میرے آسماں تھا اور خدا تھا

آنکھ کے زنداں میں کاٹی میں نے میعاد جدائی

اس نے جب آواز دی میں تھک تھکا کر سو چکا تھا

میری آنکھوں میں انوکھے رنگ و بو کے ذائقے تھے

تیرے چہرے کا نمک بھی شہد سے میٹھا لگا تھا

ساز ملکوتی صفا زادوں نے چھیڑا تھا کوئی پھر

پھر پس دیوار گریہ ایک میلا قہقہہ تھا

اس نے اپنے آسماں سے نور کی خیرات بانٹی

میری پیشانی کا روشن چاند ورنہ بجھ چکا تھا

سب کی دستار فضیلت میں ہزاروں پیچ و خم تھے

اور ہاتھوں میں اپاہج نیکیوں کا اک عصا تھا